Ua oo mai le vaiaso tatou te faamanatu ai le soifua ma le maliu ma le toe tu mai o Iesu Keriso. E ta’ua e Kerisiano lenei aso faamanatu o Paseka po o Eseta. A o a mea na tutupu ina ia paia ai Paseka po o Eseta? Aisea e taua ai Iesu Keriso i lo tatou olaga?
E pei ona tatou faitau i le Tusi Paia, na fanaua Iesu e Maria, a o le Tama o Iesu o le Atua lea. Talu ai ona fanaua Iesu e le Atua, e ta’ua Iesu o le Alo o le Atua. Ina ua soifua o ia, na mamana Iesu ona o lona sootaga faaleaiga ma lona Tama. Na lavatia Iesu le ave i ona luga a tatou agasala uma, o lona uiga, na mafaia e Iesu ona avea ma o tatou Faaola.
O aso o Isaraelu anamua, na osia ai taulaga i tamai mamoe e avea ma togiola mo Isaraelu. Ae peitai, ana le seanoa le taulaga o le Togiola moni, o Iesu Keriso lea, po ua le aoga taulaga uma a Isaraelu, aua e leai se mana i le toto o tamai mamoe e faaolaina ai le tagata. A o le toto masaa o le Tamai Mamoe a le Atua e mafai ai ona faaolaina i tatou uma lava.
Talu ai ona le atoatoa tagata uma lava, ua na’o Iesu lava e atoatoa lona soifua, e le mafai ona tatou sao atu i le malo o le Atua, aua e le mafai ona talia e le Atua se mea eleelea i lona malo. E mafai ona toe mama i tatou e ala i le togiola a Iesu Keriso. Afai tatou te salamo i a tatou agasala, afai tatou te gauai i aoaoga a perofeta, afai tatou te osi feagaiga ma le Atua i le ui ifo i le vai papatiso ma le mauaina foi o le mea alofa o le Agaga Paia i le faaee mai o lima e se ua iai le pule tatau a le Atua, afai tatou te tumau i le usitai i poloaiga a le Atua seia oo i le iuga o lo tatou olaga, e mafai ona tatou toe foi atu e nonofo i le malo o le Atua i le olaga a sau.
Na fetalai Iesu i upu e faapea, “Afai e le fanau se tasi i le vai ma le Agaga, e le mafai ona sao o ia i le malo o le Atua;” (Ioane 3:5) “Afai tou te alofa mai ia te a’u, ia outou tausi mai i a’u poloaiga;” (Ioane 14:15) “O le tumau [foi] seia oo atu i le gataaga, e faaolaina o ia.” (Mataio 10:22)
O toe aso o lona soifua, na ave faamalosi ai Iesu e tagata amioleaga e fasiotia o ia. A’o le’i ave o ia i luma o Kaiafa, Pilato, ma Herota, na tigaina Iesu i le faatoaga o Ketesemane. Na tauaveina e Iesu o a tatou agasala uma. Na ia puapuagatia i a tatou puapuaga faaleolaga uma lava. O lea, e mafai ona tatou faalagolago ia Iesu. E ala ia te ia, e mafai ona ave esea a tatou agasala pe afai tatou te salamo faamaoni. E mafai foi ona ia faamafanafanaina i tatou pe a tatou mafatia.
Ina ua maliu Iesu i luga o le satauro, na tanumia o ia i le tuugamau i se faatoaga. Ina ua mavae aso e tolu, na o ane nisi o soo o Iesu i le tuugamau. Ina ua latou taunuu atu i le tuugamau, na latou vaai i ni agelu e toalua. “Ona la fai mai lea ia te i latou, Se a le mea tou te saili ai le ua soifua i e ua oti? E le o iinei o ia, a ua tu….” (Luka 24:5-6)
Ona o le toe tu mai o Iesu Keriso i le aso tolu, tatou te toe tutu uma ai pe a mavae le oti. Ona tatou o atu lea i le pa faamasino o le Atua, “e taitasi foi o i [tatou] ma faamasinoina e tusa ma a [tatou] amio.” (Faaaliga 20:12-13)
Ou te iloa oloo soifua Iesu Keriso. O Iesu o lo tatou Alii, o lo tatou Faamoemoe, ma lo tatou Faaola. O Iesu “o le ala, ma le upu moni, ma le ola; e le alu atu lava se tasi i le Tama, pe a le ui mai ia te [ia].” (Ioane 14:6) Aisea e taua ai Iesu Keriso i lo tatou olaga? Aua e ala ia te ia tatou te toe ola ai.
